Автор

      IMG-20190325-WA0035

Кулун тутар 25 күнүгэр Норуоттар икки ардыларынааҕы суруйааччылар түмсүүлэрин уонна Саха республикатын суруйааччыларын союһун чилиэнэ, устар ууну сомоҕолуур уус тыллаах кэрэ кэпсээнньит, айылҕаттан айдарыылаах хомоҕой хоһоонноох поэтесса Любовь Егоровна Горохова – Сүүмэх Усуйаана улууһун Усуйаана нэһилиэгэр ыалдьыттаата. Сахабыт сирин биир дьикти, кэрэ айылҕалаах, баай дириҥ историялаах Усуйаана сиригэр түөлбэлээн олорор дьону-сэргэни кытта көрүстэ-билсистэ, истиҥ-иһирэх тылынан ирэ-хоро кэпсэтэн санаа атастаста.

     Кини аҕата, Горохов Егор Петрович 1936 сыллаахха Усуйаана оройуонун  Хаһааччыйа бөһүөлэгэр төрөөн-үөскээн, улатан осуоланы бүтэрэн баран ДьГУ история салаатыгар үөрэнэ киирбит, үөрэҕин бүтэрэн баран өр сылларга Аммаҕа Соморсун оскуолатыгар история учууталынан үлэлээбит. Егор Петрович билигин кэргэнин дойдутугар – Соморсуҥҥа олорор, сааһа 83-һэ.

    Любовь Егоровна айар үлэтин туһунан бар-дьон уйулҕатыгар киирэр гына бэрт кэрэхсэбиллээхтик кэпсээтэ, истээччилэри кытта бэйэтин ис санаатын иһирэхтик үллэһиннэ.

    “Киһи тыла – ох” диэн өбүгэлэрбит уот харахха эппиттэринии тыл диэн иччилээх, илбистээх-иэйиилээх, абылыыр күүстээх буоллаҕа. Ол быһыытынан тыл сүмэтин киэҥник баһылаабыт, айар куттаах Любовь Егоровна төрөөбүт тылга дириҥ суолтаны уурар эбит. Биһиэхэ төрөөбүт тыл суолтатын арааран таба туттарбытыгар сүбэлээтэ, тыл араастаах буоларын дьоҥҥо тиэрдэр гына өйдөттө: “Мээнэ, мэник, кырыыс, мэктиэ, кураанах тыллартан ураты үрдүк тыл баар – ийэ тыл. Ийэ тыл – үтүөнү-кэрэни үөскэтэр, сырдыгынан сыдьаайар, алдьархайтан араҥаччылыыр, сидьиҥ санааттан харыстыыр. Дьиҥ ийэ тылынан саҥарыы киһи араас быртах өйүн-санаатын ыраастыыр, кутун-сүрүн эмтиир. Ийэ тыл киһи олоҕун оннук түстүүр айылгылаах”, — диэн итэҕэтиилээхтик кэпсээбитин биһиги – олохтоох дьон олуһун сэргээн иһиттибит, кэрэхсээтибит.

   Любовь Егоровна Горохова – Сүүмэх 5 кинигэ автора. Ол курдук, “Эр киһи таҥара бэлэҕэ”, “Олоххо мин тыган ааһабын”, “Ийэ тыл Хотун Айыыһыттаах”, “Бухатыыр уонна бэдэр”, “Таптал сирдьиттээх киһи диэн ааттаах” диэн сүрдээх үчүгэй айымньыларын туһунан олус кэрэхсэбиллээхтик иһирэх тылынан наллаан олорон кэпсээтэ.

    Бириэмэ булан бөһүөлэкпит кэрэ-бэлиэ сирдэринэн сылдьан тапталлаах Дьааҥы эбэбитин, айылҕабытын көрөн дуоһуйа сынньанан барбытыттан олуһун диэн үөрэбин.

    Любовь Егоровна төрүт сиригэр-дойдутугар – Усуйаанаҕа кэлэн күүс-сэниэ ылан, дьонун-сэргэтин кытта көрсөн, сэлэһэн олуһун астынна уонна: “Инникитин өссө да манна, хоту дойду маанылаах сиригэр – Усуйаанаҕа кэлэ сылдьыам”,- диэн баҕа санаатын тириэртэ уонна алгыһы кытта нэһилиэк библиотекатыгар 6 авторскай кинигэтин бэлэх уунна.

    Айар куттаах Любовь Егоровнаҕа айар аартык устун алгыстаах айаны, айымньылаах олоҕор үрдүк ситиһиилэри, чэгиэн-чэбдик доруобуйаны, тус олоҕор, дьиэ кэргэнигэр дьолу-соргуну!

    Айылҕаттан айдарыылаах, дьиҥ-чахчы талааннаах маннык кэрэ киһи биһиэхэ – Усуйаанаҕа кэлэн ыалдьыттаан, күннээҕи олох араас кыһалҕаларын туһунан дьону-сэргэни кытта үллэстэн, сүбэ-ама, төһүү буолбутугар махталбытын тиэрдэбит. Любовь Егоровна этэҥҥэ сырыттын, айар үлэтэ силигилии сайдан бар-дьоҥҥо сырдыгынан сыдьаайа, күүс-көмө буола туруохтун диэн алгыыбыт!

Колодинская Туйаара Николаевна, Усуйаана нэһилиэгин библиотекаря. Кулун тутар 27 күнэ 2019 сыл.

 

 

Ответить

Ваш e-mail не будет опубликован. Обязательные поля помечены *